يوم ميلادها (إهداء إلى زوجتي في عيد ميلادها )

[زين العابدين هاشم]

كنت أنا ف أولى ابتدائي
لما قلبي
فجأة دقّ...
لما صوت
مولودة نونو
شق همس الصمت
شقّ
صوت ... طرب
منول ... رقيقة
ليها حضن الدنيا
رقّ
ـــــــــــ
لما رُحت الثانوي كانت
هي أوزعة
ف خمسة تاني
الضفيرة
وش خمري
ودن بتحب الأغاني
عين بتلمع باللماضة
بالمسائل
بالأماني
قلب لسة يادوب بتبدأ
تتزرع فيه المعاني
ــــــــــــــــــ
لما رحت الجامعة كانت
هي راحت
إعدادية
مريلة لبني وجونيلا
حاضنة شنطة مدرسية
خلطة من طيبة وشقاوة
كيلوباترا
خانكاوية
خلطة من جرءة وكسوف
من عيون ناعمة وزكية
ـــــــــــــــــ
مرت الأيام وكبرت
اصبحت
أحلى صبية
والجنان يكبر معاها
والطيابة المصراوية
والحنان والرقة زادوا
والشعور بالمسؤلية
فكرة الاسلام كمان
سكنت الروح الأبية
شابة
والفن رسالتها
للخلافة الإسلامية
والأغاني والليالي
أصبحت
أناشيد شجية
أصبحت كل المواهب
رهن دعوة ربانية
ـــــــــــــــ
كنت أنا
يادوب بافكّر
مين تشاركني ف حياتي
مين ألاقي ـ خديجة ـ فيها
كفها يمسح آهاتي
مين ف بحر الدنيا تبقى
ف السفينة
طوق نجاتي
مين تقويني بايمانها
والشيطان شاطر
وواطي
مين تكون
بالظبط أمي
إنما لبكرة اللي آتي
مين هاتتحمل رخامتي
او فضولي
وفلسفاتي
مين تعيش ويايا فقري
او تصدق انجازاتي
مين تقولي
أوعى تركع
لو يقول الكل طاطي
ــــــــــــــــ
والنصيب شاور عليها
والجميع شاور عليها
قلبي هو كمان ساعدته
إتلفت
شاور عليها
قالي هي دي
يا كابتن
اللي بتدور عليها
اللي هاتدفيك رموشها
اللي بكرة بين ايديها
هي دي محضن ولادك
هي دي في الدنيا زادك
هي دي قدرك يا زيزو
اللي مكتوب يوم ميلادك
ـــــــــــــــــ
هي دي كل الحكاية
اللي بدأت
يوم ميلادها
واللي كل عام ألاقي
قلبي رايح ،،، جاي
يعيدها
وألقي نفسي باقول ياربي
خلي كل الدنيا عيدها
وبايمان
كمان ،،، كمان
وبحنان
يارب زيدها
والهدايا
ايه الهدايا ؟!!
جنب لمسة شوق بايدها
الهدايا مش كفاية
حتي لو قدمت ليها
كل احلامي وصبايا
الهدية بجد لما
ندخل الجنة
ووعيدها
برضه قلبي هايجي تاني
يحكي قصة
يوم ميلادها

[لين]

ايه الجمال دة كله ---- كل سنه وهى طيبه وعقبال 100 سنه (ماتنسوناش فى التورته --يا كابتن)

[شرسه]

ماشاء الله عليك ربنا يخليكو لبعض ويسعدك وعقبال كل سنه في سعاده وصحه وراحه بال
طريقه تعبير ولا اروع
مش عارفه لي في اولها وحضرتك بتوصفها بالمريله والضفيره افتكرت اغنيه منير المريله كحلي

لا بس بجد هوا في كدا دلوقت
تسلم ايدك

[مصريه مسلمه]

ماشاء الله ايه الكلام الجاامد ده
كل سنه وهيا طيبه وكل سنه وانتم سواا وتقول فيها احلي كلام ماشاء الله ربنا يحميكم من العين

[abu_nour]

جميلة جدا جدا .. ربنا يسعدكم ويهنيكم

[Sunbird]

جميله جدا جدا
ربنا يسعدكم يارب
كل سنة وهى طيبة ومنورة حياتك يا رب

[نورانية]

رائعة يا أستاذ!!


بجد مش عايزة أبطل قراءة !!

تلك السلاسة و السهولة و العـــــذوبة
و الحب المتهادى برقـــة
و الحنين الذى لا يفارق نفسك حتى و أنتَ معها

كل هذا الفرح باقتران الحياة بها
و هذا الاحتفاء بروعة وجودها

مع نشر الرداء الإيمانى الربانى
الروحانى الذى يكلل كل أمنية
لكما..
و كل دعوة لربكما.

****

لقد رسمت لنا صورة واضحة و قريبة
و رائعة حقا يتمناها الكثيرون
و يأملون العيش فى ظلالها صورة مثالية
للعلاقة الواضحة الجميلة
و الأسرة الدافئة السعيدة
أدام الله عليكَ نعمة وجودها
الذى لا يعادله سعاده
و أدام عليها نعمة تقديرك الجزيل
لروعة حياتها معكَ

و لها و لكَ تحياتى
أشكر دعوتك المميزة .

[زين العابدين هاشم]

ايه الجمال دة كله ---- كل سنه وهى طيبه وعقبال 100 سنه (ماتنسوناش فى التورته --يا كابتن)

وانتي طيبة يالين ،، والتورتة طبعا طبعا ،، بس لسة في شهر ستة الجاي بقى ،، معلش القصيدة قديمة بس قلت اعيدها هنا معاكم ،، شكرا على المرور الرقيق

[زين العابدين هاشم]

ماشاء الله عليك ربنا يخليكو لبعض ويسعدك وعقبال كل سنه في سعاده وصحه وراحه بال
طريقه تعبير ولا اروع
مش عارفه لي في اولها وحضرتك بتوصفها بالمريله والضفيره افتكرت اغنيه منير المريله كحلي

لا بس بجد هوا في كدا دلوقت
تسلم ايدك

كل البنات لبسوا المريلة ،، لكن مش كلهم عاشوا تفاصيل المرحلة بدقة ،، وكذلك الأولاد ،،
الحياة يا شرسة اجمل واعمق واروع بكثير مما نتخيلها او نراها من خلف ستار سميك من ملل ومشكلات الحياة ،،
الشاطر اللي يعيش فيها كل لحظة ولا ينتظر ان تتحسن الظروف ليستمتع بالحياة
تحياتي لمرورك الشرس ـ الرقيق ههههه

[رانيا نور الدين]

مرت الأيام وكبرت
اصبحت
أحلى صبية
والجنان يكبر معاها
والطيابة المصراوية
والحنان والرقة زادوا
والشعور بالمسؤلية

ياسلام يا زين وصفت البنت المصرية تمام
طيابة وشقاوة وجنان وعفرتة
هو فيه زيها ابدا
تبقى مع شريكها على المرة قبل الحلوة


جاري الحفظ في جهازي
سلمت يداك وربنا يكرمك فيها يارب
وكل سنة وانتوا طيبين


وصفت فأبدعت

[زين العابدين هاشم]

مصرية مسلمة ،، بجد مرورك الخفيف كان رائعا ودعائك اثلج قلبي ،،
كل سنة وانتي بكل خير وأمان وسعادة مع من تحبي

[زين العابدين هاشم]

دينا ،،، شكرا جدا على الدعاء ،، وربنا يجعل ازواجنا وابناءنا كلهم قرة عين لينا ،، ويبعد ما يعكر عنا جميعا الحياة وفرحها وبهجتها

[زين العابدين هاشم]

ابو نور ،، شكرا على مرورك الرائع ،، ربنا يسعدك مع كل احبابك

[زين العابدين هاشم]

نورانية
بجد تحليلك للقصيدة ،، يثبت ما أقوله دائما ،، ان هناك متذوق للشعر أكثر شاعرية من الشاعر نفسه ،،
كل معاني القصيدة بالفعل ليست فقط وصف خاص بقدر ما هي وصف عام لكل ما اتمناه بين كل زوجين ،، يصارعان الدنيا ويزرعون فيها فدادين من الفرح والأمل والبهجة مقابل ما يزرعه الشياطين والأشرار من فدادين الشوك والضياع
كل التحية والود

[زين العابدين هاشم]

رانيا ،،
فعلا البنت المصرية كل اللي قلتيه وزيادة ،،
ووصفي لزوجتي ماهو الا وصف لكل المصريات المعجزات
اللي بيجمعوا كل ما تملكه النساء متفرقات ،،
الشقاوة مع الدين والحياء
الجنان اللذيذ مع العقل والتدبير والمسؤلية
الضحكة الحانية الرقيقة مع القوة في تحدي الحياة وصعابها ،،
يااااااااااه البنت المصرية ،، بس لو تتربى صح وتوضع في البيئة الصح ،،، تصبح ملكة نساء الأرض
،،،
وطبعا انا عارف انتي نزلتي القصيدة على الجهاز ليه
ههههههه
شكرا على مرورك الجميل

[المهندس علي حسين وادي]

ألله يخليكو لبعض ويسعدكو..ويوعدكو بالجنة..

[مجدى تركى]

رائعة جدا يااستاذ زين كلمات سهلة وعانى عميقة ومشاعر متندفقة بجد روعة
كل سنة وهى طيبة وانتو فى حب وخير وسعادة

[Noura]

الله عليك يا زين
فى كلمة كتبتها لزوجتك
والله على الحب
والجمال
والاحساس العذب .. السهل والصعب فى نفس الوقت

جمال وصفك للانثى
اللى هى فى الاصل بنت مصرية
البنت الصغيرة الشقية .. اللى بتكبر معها احلامك
والحب كل يوم يزيد جواك
حبك لادبها وجمالها وتدينها

بجد يا زين .. ربنا يسعد ايامكم
ودائما كده عايزين نستمتع معك بكلمات صادقة
وجميلة من قلمك الرائع

[رضوه@]

[ناهد المصرية]

جميلة المشاعر الفياضة بالحب والذكريات
وبصراحة فكرتني بصبايا ولما كنت أذهب للمدرسةوزوجي
يقف مخصوص عند محل على الناصية علشان يراني
عن قرب وأنا ذاهبة المدرسة ههههههه
وأول لما سكنا جديد كنت أنا قزعة وهو شافني وأخذ باله
وأنا طبعا كنت صغيرة على الحب
ومأخدتش بالي منه بس هو حكالي بعدين ههههههه
معلش بقى سرحت شوية وتذكرت الذي مضى
مشكور يا أخ زين على هذه القصيدة

[أسماء هاشم]

يسلام عليك يا استاذ

دائما مبدع واروع ما فى إبداعك

ذلك الصدق المفعم بالاحاسيس

والوصف الرائع لشريكة العمر

حقا ياليت الرومانسية فى عصرنا هذا تكون بهذا الشكل

وكل عام وزوجتك بالف صحة وسعادة

[أمة الودود]

ما شاء الله
وصف رائع و سهل يعرف طريقة للقلب دون دليل
بس يا ترى يا أستاذ زين
أهديت لزوجتك حبيبتك الكلام الحلو دة
يارب يسعدكم و يجعل كل أيامكم أعياد

[زين العابدين هاشم]

شكرا ليكم جميعا على هذه التعليقات التي تزيد كلماتي وتكمل معانيها ،، وتؤكد أن المعاني لا تخص شخصا لانها معاني عامة كلنا نعيشها ونتمني ان تستمر ولكن زحام الحياة دائما يقف حائلا بين استمرار متعتنا بها ،، والشاطر هو اللي يقدر يتعايش ويتلافي ملل الحياة ونمطية الأيام ومشاغل الدنيا التي لا تنتهي ،، فمشروعك الأول في الحياة هو بيتك وشريكك الاول هو زوجتك او زوجك ،، والشيطان يجند كل قواه في تلك المعركة لانه يدرك أن نجاحها هو نجاح كل البشرية والمجتمعات وصلاح كل البيوت وكساد بضاعته المزيفة بكل أنواعها

[مصريه مسلمه]

استاذي الفاضل دعوتك للمشاركه في موضعك اسعدتني جدااا
واجمل شئ في كلامك تعبيرك الجميل عن علاقتك الطيبه بزوجتك التي احبتتها دون ان اراها فالزوجه التي يقول زوجها فيها مثل كلامك حقا هيا زوجه عظيمه وصالحه بكل المعني تحياتي لها في عيدهاا

[زين العابدين هاشم]

متشكر جدا يا مصرية مسلمة على شعورك الطيب وتعليقك المليئ بالدفئ والحب والفهم العالي النبيل ،، ودعوتي لك في موضوعاتي شرف لي ،، تحياتي واعجابي

[karimaly78]

كل سنه وانتم طيبين

حلمت بك
أقصد حلمت معك
أو بالاحرى تمنيت
فى حلمى ان أكون معك
تمنيت ان تسكنى قلبى
وتتملكى وجدانى
ان ترقصى على وتر حبى
وأن تتغلغلى فى ثوانى
لتدق ساعة الغرام
دق الهوى فى ألحانى
تمنيت ان المس يدك
وأضعها على خدى
ان أقبل جبينك كى
يطيل الله عمرى
تخيلت ان اقول احبك
واقولها واقولها وانت لا تجيبينى
نظرت مذهولا لا أعرف ماذا أقول
فقلت : ما بك انا فعلا لا أحبك
بل اعشقك واعشق روحك

[زين العابدين هاشم]

كل سنه وانتم طيبين

حلمت بك
أقصد حلمت معك
أو بالاحرى تمنيت
فى حلمى ان أكون معك
تمنيت ان تسكنى قلبى
وتتملكى وجدانى
ان ترقصى على وتر حبى
وأن تتغلغلى فى ثوانى
لتدق ساعة الغرام
دق الهوى فى ألحانى
تمنيت ان المس يدك
وأضعها على خدى
ان أقبل جبينك كى
يطيل الله عمرى
تخيلت ان اقول احبك
واقولها واقولها وانت لا تجيبينى
نظرت مذهولا لا أعرف ماذا أقول
فقلت : ما بك انا فعلا لا أحبك
بل اعشقك واعشق روحك

عزيزي karimaly78 تشرفت بمرورك وكلماتك الرائعة ،، واتمني دوام التواصل

[Sunbird]

كل سنة وهى طيبة
وكل سنة وانتم دائما مع بغض
وكل سنة وانتم سعداء دوما
كل سنة وانتم احلى زوجين
وعايشين حب في حب

[زين العابدين هاشم]

وانتي طيبة يا دينا مع ان مفيش اطيب من كدة ههههههه
وربنا يهبك السعادة في اسرتك وينشر الوفاق والتفاهم والحب في كل بيوتنا